Samir Perihana

TRËNDAFILI I POETIT

Kur e varrosën

Oratorët derdhën mbi varr karvanë me elozhe dhe fjalë

“ Poet i pavdekshëm, zë bilbil “

“ Thuajse dantesk, thuajse bodler “

Mes kurorave shumëngjyrëshe kishte zënë vend një trëndafil

Në të shtatat

Nuk ja kursyen lëvdatat

Mes tyre shkarazi edhe ndonjë gabim që kish bërë pa dashje

Ndër kurora shumëngjyrëshe qëndronte i njëjti trëndafil

Si një pusullë e pahapur

Në të dyzetat

Thanë për të se ishte poet i mirë

Poet që e donte njerëzinë edhe lirinë

Edhe pse kishte bërë disa gjynahe në të ri

Mes kurorave dhe luleve qëndronte i njëjti trëndafil

Ardhur kushedi se nga ku

Kush e di sesi

Pas të dyzetave

Edhe vajza e djali i shkojnë rrallë e më rrallë

Veç trëndafili petale argjend është aty

Pa e harruar poetin asnjë çast