Drago Siliqi

LIRIKË

Që ditën e parë të dashurisë

Ne fjalët tona ligje i bamë:

Përgjysëm çastet e lumtunisë

Përgjysëm hallet tona ndamë

Çdo gja përgjysë do e kemi në jetë,

Qysh dy fatet i bashkuem

Kur njani frymëzim të ketë

Do të jetë dhe tjetri i frymëzuem…

Unë flas për ty e ti për mue

Si për vetveten, kush t’na pyesë

Dhe me ba fjal’ e me u zemrue

Të drejtë kemi gjyspërgjysë!

Në t’ardhmen, vajz’ a djalin tonë

Përgjysë do e kemi unë’ e ti

Por gjysmat tona gjithmonë

Janë e mbeten vetëm nji…