Meçan Hoxha

STUDIO POETI

Kërkoj një studio poeti.

-Urdhëro më thanë, te një portë xheneti.

Përpara u shfaqën hapsira me lule,

Vajza në valle plot hire e nure.

-Ju lutem, kërkoj një studio poeti?

U hap një tjetër portë, sa qielli e deti,

Mistere dhe yje pa anë e numër.

-Urdhëroni, çfarë keni humbur?

-Studio poeti kërkoj, përsërita unë.

Zogjtë, këngët, bletët dhe stolitë,

Dielli, hëna, fusha, mali dhe gjithë mrekullitë,

Njëheri u përgjigjën – Ne jemi.

E, po nuk u binde as me ne,

Shko te ëndrra, dhimbja dhe loti,

Vrapo udhëve të botës, edhe sipër mbi re,

Dhe ndalo, kur të shohish bukuri e dashuri,

Aty është poeti.