Poezi: John Yamrus

POETI AKADEMIK

është përfshirë në

antologji të panumërta.

ai ka marrë bursa

dhe grante.

ai është i njohur si aktivist

dhe socialist.

ai aktualisht është duke botuar

një poemë goxha të gjatë

që do t’i ketë disa vëllime,

plot me referenca misterioze dhe të errëta.

të paktën një herë në muaj

citon Eskilin

dhe Pindarin.

ka botuar disa vëlime të bisedave dhe

eseve.

e luan për merak

këtë lojë.

gjithmonë është i sigurt të shtrëngojë

dorën e duhur.

ai po ashtu

kurrë s’ka pasur thua të thyer

dhe qeni i tij kurrë nuk ka vjellë në qilim.

faturat i paguan gjithmonë

s’ka bërë vaki

ta ketë humbur

ndonjë vakt buke.

çorapet gjithmonë i ka çift,

flokët gjithmonë të krehura

kurrë nuk ka bërë ndonjë gomarllëk

para familjes  apo miqve.

edhe

poezia e tij

e dëshmon një gjë të tillë.

në të nuk ka shpirt,

nuk ka koqe.

është krejt boshe…

sall muhabet.

kur të vdesë ai,

akademikë të tjerë

do të diskutojnë për jetën e tij

dhe do t’ia analizojnë librat.

njerëzit do ta harrojnë.

kurse akademikë të tjerë

do t’ia zënë vendin.

dhe të tjerët

së shpejti do t’ua vendin zënë atyre.

kam frikë

se gjithmonë do të ketë

akademikë,

të buzëqeshur, me besim në vete

dhe të sigurt.

dhe kjo

është vetëm edhe

një arsye më shumë

se përse ju

absolutisht keni nevojë

për

dikë

si

unë.

POETËT E FACEBOOK-ut

   duket se i kalojnë ditët

  duke uruar njëri-tjetrin

    për gjenialitetin e tyre

       për bloget e tyre

  për faqet e tyre të internetit

        për fotot e tyre

       për kafen e tyre

      për drekën e tyre.

    poetët e facebook-ut

            kënaqen

duke e quajtur njëri-tjetrin poet.

      krejt të obsesionuar

    me ato pëlqime të kota,

            mprihen

    kot

      se dikujt me të vërtetë

            ia ndien.

KËTA POETË TË VJETËR HALABAKA

që shkruajnë poshtë e lart

“më pëlqeu poezia jote, a të

pëlqeu e imja?”

tingëllojnë

si dy nxënës

të klasës së tretë

që luajnë

kashelashë

pas shkolle

mbrapa kishës

Përktheu: Fadil BAJRAJ