Poezi: Dori CAMAJ

SY ZEMRE…

S’e kam ndreq shtratin sot Nan’,

As teshat s’i kam palue.

Emnin tem e shkrova

N’krenën e pluhrueme t’pasqyrës..

A thu ke me u mërzit n’mue?

A ke me m’than se jam çik,

E duhet me i ndreq punt e shpis,

Se mysafiri t’brof pa lajms?

E di Nan’!

Sa her’ qi gatis raftet n’odë t’gjumit,

T’shoh n’bisht synit,

E m’dukesh se po m’sheh.

Du me i ba vedit me hile

E me kry gjithçka si t’muj,

E bash nj’aty t’i shoh duert,

Nj’ashtu t’lmueme si kadife,tuj m’prek..

Jo bij!

Un’ s’t’kam msue kshtu,

Je n’der t’huj tash, mos me m’korit!!

Fill t’diftoj qysh me punue…

Nana ish e verbën,n’mosh t’re ke qorrue,

Ani pse syt n’ball si bajshin drit,

Ajo shpirtin e kish t’driçuem.

Ajo kish sy zemre,

të mdhaj,

Ma t’mdhajt qi kam ndij n’jet!..

***

E mblodha hinin

e dashnisë sonë t’shkrumbueme,

n’nji vazo balte

pa mblojë.

Natën,

prej flladit

qi tinëz

çel dritaren,

del tuj ladrue,

e bahet

xixllonjë….

***

Ka do dit’

Qi vedin e kqyr

Tuj hec rrugve t’qytetit

Si nji skelet t’harkuem

Pa pesh,e pa ngjyr.

A ngi tash nata,

Tuj m’kafshue

Ka pak e për çdo dit’.

Kerrkush s’e kthen kryet,

Kerrkush s’m’sheh,

E s’di ma me than,

A jam nji trup,

A veç nji frym,

Qi ecën n’rrethejake,

Pa fun e krye.

Po ka dhe do dit’

Qi peshoj ma shum’

Se gjysa e bots’.

Jan’ ditët kur

Dillin e marr n’duer,

Dhe e vej n’gjum n’qerpik.

E syt’ s’i çel

Veç kur ta di,

Se rrezen e tyne,

Do e pushoj

N’sy tu.

E tuj m’shkit moti

N’lëkur’,

Mbeta me syt’ mbyll,

N’errsin,

Tuj prit me ndie

Dhambt e preht

T’natës,

Qi s’din me u ndal…

***

Un’ t’pash!

N’t’tana dritat vezllue

ke ftyra jote

pa çehre.

Me do rrath sysh

Si rratht e tymit

kur flaka përvlon pa ja nda.

Un’ t’pash!

Kryqet ,kumbon n’shpin tande,

dimnat qendis n’lëkur,

nji sy i verbën pranvere

Qi pikon gjak

Tuj vadit

Lulen e harrimit.

Un’ t’pash!

E tehu i thiks

ke ma i but

se therja n’krahnorin tem.

Me duert n’xhepa

cingrrij monedhat,

për me ble nji grim frym…

Un’ t’pash…

***

Un’ nuk menoj çdo dit’ për ty,

Java m’shkon

pa u ndie.

N’rrugën teme

s’t’kam bashkudhtar,

Gjith’,veç me nji hije heci.

Ti s’je,

Kur teshat e shtratit

I ndrroj n’sy t’dillit.

S’je as n’bulza

T’kafes,qi m’zgjon

Pa i çel dita syt’.

Rrshket ndër lot

T’vesës, e tretesh,

Si kujtim i largt

Sa nji jet’.

Kur vedin e gjej

Tuj bisedue me hijen teme,

Qi s’m’dahet prej brinjsh

Ti prap s’je!

Po s’je as kur

Hana m’fiket,

As n’guralec t’bregut zemrës,

Qi luejn n’dallgt e saj

Her’ tuj m’shpue,e her’ tuj m’puth.

N’notat e kangs shpirtit,

Vargu yt asht fshi,

A met that, heshtje mortore..

Kurr nji tingull ma s’del.

E n’fotografin ton pa ngjyr’

Flen nji gri si thelb dimni.

I kam rujt veç dy moll t’kuqe,

Ja me t’amelzue,

Ja me t’shti n’mkat.

***

Asht nji vend…

Që mban do andrra…

T’harlisuna n’sy shpirtnash…

Asht nji gji…

Që mban nji flak..

T’përzhitun n’hi yjsh..

Asht nji vash..

Që kep dhimtën e zemrës..

Me fill ari t’flokve ujvarderdhun..

Asht nji Natë..

Që n’skuta t’jets fshehet..

E dits ja merr edhe diellin e parë…

Hiç pa i çel sytë..

***

Pshtillet moti…

Don me ra shí..

N’deg t’pemve..

Dy ketra..

Luj’n e gjuhen..

Grahin vrap..

Tuj ndjek shoqi-shojn..

Nji lajthi e gjet njani..

E tjetri e kqyr kok’ul..

Avitet,e i zgat duert..

Lajthin me ja dhan..

Me do sy qi shndrisin..

N’vedi e afron..

E ikin tuj ladrue..

Nj’ashtu kadal,dimnin tuj e shtrue..

Ndër deg’ e flet’ n’flet’…

N’nji valle ketrash..

E gat sa nji jet’..

M’vjen ndërmend..

Nji thagm nanash..

Kur fmija lypshin me hangër pa ja nda..

I shtrojshin ç’ka t’kishin..

Me zort e me lezet..

E nanat kqyrshin qiellin..

N’dor t’Zotit, ka me mbajt dimën i ftoft simjet..

***

I kom pjek do g’shtenja t’vogla..

I kom zgedh t’rrumullakta..

Boj vjeshtore,t’amla..

Qysh f’mij e kom rujt nji shami..

T’qëndisun prej nan’s, dy germa..

N’te i kom pshtjell..

Du me i rujt nj’aty për ty..

Se druj se ik moti i tyne..

E kur t’vish,m’etesh pa i provue..

I kom grrith ka’pak..

Me i ba ma t’urta n’zjerm..

E n’çdo grith,kom shti pikla zemne…

I kqyr me do sy t’mushun..

I kom shpres’,durim e vaj..

E mbledh cepash shamine e çiknis’..

Mbysh n’andrra dashnije n’për skaj…

***

A sosun vaji i kanilit

Ka jep shpirt

N’grahma t’funit

Flaka a met’ sa grima

Sa e zez’ e thonit.

S’t’fal nata

T’perpi e t’ziton

Krah shtrue

E kur t’hupesh n’te

Zor se kfjellesh.

Ti s’ki me ardh

E di

Tash t’njoh mir’

S’ma prish má

Tymin e cingares.

E llamba le t’shkimet

Baj dhe pa drit’

Ksaj bote t’rreme

Me fruta t’kalbuna

Veç nata ja mblon shëmtin…

***

Du me ta germëzue emnin…

Du me ta thirr aq fort…

Sa edhe t’dekunit me e ndie..

M’andej me e shkrue..

N’t’tana faqet e mureve t’mehallës…

Me boj’ t’gjakut…

M’andej hyjt kam me mledh..

E n’kup t’qiellës me i gatit…

Qi emni yt me shndrrit…

E n’mos u bindsh..

Për dashnin teme…

Po t’diftoj..

Se e kam skalit…

Bash n’shpirt….