Alma Zenellari
NJË DALLËNDYSH, PRES!
Të pash dallëndyshja ime kur erdhe,
Vrapova mallshëm dritares
për të shijuar fluturimin tënd.
Ti erdhe me cicërimë, zhurmuese.
Me flatra të gjalla vallëzove nën folezë.
Oh sa e bukur ardhja jote!
U vonove pak sa malli mu bë syth,
Sa malli trazoi këngën e erës dhe resë,
Me fije të brishta bari në buzë, ti cicërite,
Eja dallëndysh! Çele një syth, çele një gjeth
Se ardhja jote është ngazëllim i ajrit,
është limfa që lëvrin trupit ,
drerët e pemëve nisin vrapin
nga një tufë e kaltëreme resh .
Harlisin brirët, përqafen
sytë u ndrijnë nga lumturia.
Eja dallëndysh, se ardhja jote thërret agimet,
Thërret bletët,fluturat në dritare,
Se ardhja jote më çel në zemër zambakun e bardhë të paqes ,
një lulëkuqe ngre kyet në fushë
dhe unë ndizem prush.
Eja dallëndysh !
Me gishta blerosh një verore dy ngjyrëshe
e lë varur mbi degë pemësh për ty. Merre !
Me sqepin e brishtē bëje hark ylberi ,
mbaje syve këtë hark ngjyrash,
këtë hark drite,
Ngazëllema stinën e luleve me bisqe cicërimash!
* **
Në zemrën time
zgjohet çdo pranverë
një dallëndysh!
SELVITË
Bien selvitë nji nga nji
Qindra zogj përloten në rënie,
Fole dhe flatra thyhen në mes
Një sqep i përgjakur
thellë zemrës bëhet dhimbje .
Bashkë me cicërimat
dhe kënga ime vdes!
Qan prilli me lot dudish
Përse bien këto selvi,
me shpirtin dhe sytë drejt qiellit?
Ato që supeve mbajnë lindjet,
muzgjet, perëndimet e diellit…
Selvi të mbushura me dritë ,
Strehë e stinëve të bardha,
Strehë e këngëve të mia!
Qan e s’gjen ngushëllim.
Çahet nga malli
mes degëve, dudia
GRA TË GJELBRA
Po ç’është kjo grua,
që mbledh zogj në kraharor
që dritë të gjelbër
mbledh në sy ?
Ç’janë këto nuse, ç’janë këto gra?
Si u shfaqën aty ?
Si gjelbëruan kaq papritur,
kaq nxituar ?
Hap e mbyll krahë,
hap e mbyll duar,
Ëndrra dhe yje , fole dhe flatra,
I bëjnë bashkë çdo stinë.
Ato të bukurat si nusërojnë kështu?
Lodhje nuk njohin
Lodhje nuk dinë…
ANATOMIA E NJË BURRI
…Shkëndi që ndez zjarre
burim i pasosur,
horizont ku zgjohen mëngjeset
dhe flenë perëndimet.
Lot i heshtur,
trokitje, mërmërimë,
dëshirë e çmendur.
Çarku i buzëve të mia
kurth i ëndrrave të marra.
Ortek,
Lindje,
Perëndim.
TË DISH…
Të dish ç’është një pritje!
Për këtë duhet të ndjesh
si dridhet duarve të mia, një lule,
si bien mbi trotuar
petalet e saj gjithë dhimbje.
Duhet të kuptosh
pse mërmërijnë dy buzë,
pse mblidhen retë brenda syve të mi,
Pse rrudhet dielli pas shpine,
(bulëza djerse rëndojnë flokëve )
Pse zogut në duart e mia i përflaken krahët…
Por kur ti vjen,
Çdo gjë pëŕreth ndryshon papritmas,
Retë ndryshojnë formë,
Pemët ngjajne me kaproj të hutuar,
(çuditèrisht të bukur)
Zërat ndryshojnë ngjyrë,
Në stacion hapa njerëzish ndjekin ritmin
e një valsi të munguar…
Zogu në duart e mia kaltëron
dhe unë e lë
të hap një udhë në qiell…
Me ardhjen tënde pra,
u ndez një dritë,
u çel një udhë
Dy sy u bënë buzëqeshje,
Një zog vetveten gjeti në fluturim.
Mbi fletë trëndafili,
dhe zemra ime befas u çel!
NDONJËHERË!
Më ndodh ndonjëherë të të pres,
atëherë kur frymën ma zë malli,
në kafazin e hapur të dritares,
hyn ajri dhe më prek me gishtat e tu,
çdo gjë përreth më sheh me sytë e tu
dhe unë drithëroj…
Bien nji nga nji gjethe padurimi
dita bëhet e bardhë
ardhja jote gjithashtu…
Më ndodh ndonjëherë të të krijoj
(prej mallit sigurisht),
ndonjëherë prej erës,
ndonjëherë prej shiut,
ndonjëherë prej dritës,
dhe ti kthehesh arsye e zjarrmit dhe gëzimit,
e ankthit dhe frikës
Trembem mos më ikën…
Më ndodh ndonjëherë të të them
është koha të vish,
është koha të kthehesh
se dita nuk mbushet me ajër, me dritë
se dita ankohet nga pritjet e gjata,
se nata po fiket në duart e mia,
dhe loti dhe ylli ngadalë vdes
pa ty , nga kjo mungesë…
Më ndodh, më ndodh ndonjëherë
Që malli frymën ma merr !