Armenida QYQJA
PSALM I NETËVE TË MIA
Në terrin e natës llamburin një mendim,
Sa herë e trembur, hap sytë,
Të përgjumura, të thërrasin ty buzët,
Si një psalm, sërish e sërish…
Shkëndijat ndezin ajrin e fjetur,
Emrin tënd, e bëjnë qiri,
Nën flakën e kujtesës, sytë e etur,
Pranë vetes të shohin, përsëri…
Është ora dy dhe e di që duhet të flë,
Një ditë tjetër përgjon pas xhamave,
Dritën e ngrohtë dhe buzët e tua,
I lë të m’i mbyllin, sërish qepallat…
Shtator 2023
AQ SHUMË!
Në korridoret e kujtesës kundërmojnë
Parfumi yt dhe dëshirat e mia,
Që bëjnë sikur u binden frerëve,
Tek flirtojnë me gjendjen statike të ajrit,
Elektrizimin e pashmangshëm të trupave…
Kujtesa, kujtesa luan me ndjenjën
Dhe e kalon në nivelin e dytë lojën,
Duke zgjuar frymëmarrjen e rënduar,
Urinë e fshehur nën lëkurë…
Pré e saj, kam rënë tashmë,
Dhe ajo s’ka më nevojë,
Më lart se kaq ta ngrejë lojën…
Më mungon shumë, aq shumë,
Sa s’dua t’i thërras më botës racionale…
Prill 2024
MË I BUKURI MOTIV
Kafetë vazhdojnë misionin e tyre
Të ngritjes së presionit të gjakut
Ndërsa ai hiqet zvarrë, padëshirë,
Dhomave të pagjuma të kujtesës…
Symbyllur rri në shtrat dhe mendon ty,
Ndërgjegjja dhe zëri yt i thonë të lëvizë
E të vazhdojë rrugëtimin,
Të bëjë punët e pabëra…
Po e mbledh veten dhe po ngrihem,
Kokrrat e grurit dhe maja e piramidës
Shohin nga unë dhe unë nga ty,
“Kur bashkë të jemi një ditë aty”…
Korrik 2024
ME ERËN E MALLIT
Mungesat e tua mbledh e zbret heshtja,
Zemra me zero i shumëzon, përherë…
Erën e mallit tim po të nis, me të eja!
Botës nuk i duhet dhe një tjetër Saharë…
“Non grata” shpalli të tëra arsyet,
Që të vish tek unë s’të lënë!
Iluzione mjerane janë muret,
Që ndarë kërkojnë t’na mbajnë…
I shtriva krahët sërish në pritje,
Me sytë mbyllur, shtrirë në përrallë,
Me erën e mallit, sillma një puthje,
Vesën e syve, lëshoma mbi ballë…
Gusht 2021
PËR TY DHE VETEN
Po arratisem, në një guvë vetmie,
Në kërkim të vetvetes,
Ti di si t’më gjesh dhe tërë fjalëkalimet
Që çelin shtigjet…
Kur të vish, erë t’u marrësh
Tërë dashuri flokëve të mi,
Do të jetë vetëm aroma e tyre,
Asgjë e turmët, asgjë e mishmashtë…
Po iki, po shkoj tani,
Që të mund të të jap përsëri
Gruan që ti do dhe vetëm atë!
Jepmë pak kohë,
Nga vetja t’i zhvesh të tëra…
Korrik 2024
NGA DASHURIA
Ka çaste e orë që humb
Në vorbulla ndjesish të vogla,
Ushqim piranjash bëhem e pakuptuar,
Piranjash, që nga brenda-jashtë hanë…
Derisa vjen ti dhe më shkund
Me zërin tënd të butë,
Vështrimin që tret çdo zemratë
Dhe e zvogëlon botën, fëmijën e praptë…
Ti bën sikur s’e kupton
Nxitimin tim për të restauruar
Imazhin, pjesët e ngrëna të zemrës,
Një vetvete më të mirë të të vë në altar…
Qershor 2024
