Albana Shala

DËSHIRË

I ke parë ato linjat me zogj shtegtarë,

ngarkuar me lajme nga vende të largëta

përkulur nga pesha e martesave pa krushq,

nga brengat e gjysheve, kutitë me ilaçe,

grushtat me dhe, shtuar mbi dhe t’huaj,

fjongot e valixheve me fruta të ndaluara,

dosjet me firma të pathara noterësh, dëftesa, diploma,

albume bardh e zi

tendosur, në sprovë,

shkëmbehen aty kujtimet e dashura me ca byte begati.

A mund të ngremë ca linja që nuk bien,

antigravitacionale,

ngarkuar veç me zogj euforikë,

shtegtarë nga syri yt te buza ime,

çukitës thërrimesh, gëzim kënaqësie,

matës oksigjeni, në minierën e dashurisë.