Skënder Rusi

MBRËMJA IME

Ti mbrëmje qëndro me mua,

M’i hidh duart në qafë,

Përqafomë!

Kam nevojë që pikërisht

Ti të më duash,

(Të tjerët më kanë tradhtuar

Ose do të më tradhtojnë!)

Qëndro me mua ,të lutem,

Hidhe xhaketën time krahëve,

Po të kesh ftohtë!

Të dy bashkë ne mund të krijojmë

një tjetër dashuri,

Mund të ngremë nga fillimi

Një tjetër botë!

Ti mbrëmje qëndro me mua,

Dua të vdes me kokën

Mbi supin e muzgut!

Kam nevojë që pikërisht

Sonte të më duash,

Që edhe absurdi ynë

të jetë i bukur!